Атырау облысындағы әскери бөлімнен сарбаз қашып кетті

Атырау облысында шекарашы әскери қызметін өтеуге келген азамат қашып кетті. Оқиға бір күн бұрын болған. 

Orda.kz ақпарат көзінің хабарлауынша, Атырау облысы Исатай ауданында орналасқан 5575 әскери бөлімшеден сарбаз қашып кеткен. Әскерге шақырылушының жоғалып кеткені бірден байқалды. Артынша  оны Атырау облысы бойынша Ұлттық қауіпсіздік департаменті шекара қызметінің қызметкерлері ұстады.

Еске сала кетейік, сарбаз қашып кеткен шекара заставасы 2018 жылдың желтоқсан айында ашылған болатын. Одан кейін Атырау облысы әкімдігінің қолдауымен шекарашылар үшін 50 орындық модульдік ғимарат салынғаны хабарланды. Бұған дейін жаңа шекара заставасының орнында Жанбай заставасын техникалық бақылауға арналған радиолокациялық станция болған.

Тағы бір айта кетерлігі, мамыр айында Атырау гарнизонында әскерге шақырылған азамат қару алып қашып кеткен болатын. Әскери бөлім қызметкерлерінің өздері де, полицейлер де қашқынды ұстауға әрекеттенген. Бірақ ол атыс басталғаннан кейін «Арлан» арнайы жасақтары мен Ұлттық қауіпсіздік комитетінің қызметкерлерін іске тартуға тура келген еді. Ол кейіннен өз еркімен берілді.