Атырау облысында түнде тұрғындар эвакуацияланды

Атырау облысы, Махамбет ауданы, Жалғансай ауылында 22 мамырда түн ортасына қарай салынған бөгет бұзылды.

Бұл туралы Orda.kz тілшісі хабарлайды.

Ауылдық медициналық пунктті су басу қаупі бар. Жағдайды тұрақтандыру үшін облыс орталығынан қосымша күштер мен ресурстар сұралды. Облыс әкімі төтенше жағдай орнында.

Сағат 01:20-да ескерту дабылдары қосылып, тұрғындарды эвакуациялау басталды.

«Қазіргі таңда төтенше жағдайды жоюға Қорғаныс министрлігінің жеке құрамының 15 бірлігі мен 50 сарбазы жұмылдырылды» деп хабарлады аудан әкімдігі.

Айта кетейік, Жалғансай ауылы аудан орталығы Махамбет ауылынан 15 шақырым жерде орналасқан. Жалғансай ауылындағы халық саны 1286 адам. Тұрғын үйлер саны – 237.

04:00 жағдай бойынша эвакуациялау пункттеріне 154 адам орналастырылды, оның 96-сы балалар.