Атырау облысында 5 қызметтік автобус өртеніп кетті (видео)

Атырау облысындағы Теңіз кенішінде 5 автобус өртеніп кетті, қаза болғандар мен зардап шеккендер жоқ , деп хабарлайды  «ССЕР» компаниясы баспасөз қызметі.

– «ССЕР» компаниясының автотұрағындағы автобустардың бірі өртенді. Өрт бірден жанында тұрған 4 автобусқа тиді. Жалынды сөндіруге «Теңізшевройл» компаниясының өрт сөндіру қызметінен 30 қызметкер мен 3 техника жұмылдырылды. Өрт жергілікті уақытпен сағат 21:00-де толық жойылды», деді  «ССЕР» компаниясының өкілі Орақ Бисембиев.

Компания өкілі оқиға салдарынан қаза болғандар мен зардап шеккендердің болмағанын жеткізді.

Қызметтік автобустар Теңіз вахталық BBB BBC I қалашығындағы тұраққа сағат 19:00-де келіп, жолаушылар түсірілгеннен кейін қозғалысты тоқтатқан. Тұраққа қойылған автобустардың бірінің мотор бөлігінен шыққан өртті «ССЕР» компаниясының сигнал беруші қызметкері байқап қалған.

– Алғашқы қызметтік тексеріс көрсеткендей, дабыл беруші тұрақтың арт жағындағы  автобустардың бірінің қозғалтқыш бөлігінен шыққан түтінді көрген. Ол дереу кезекшіге хабарлаған. Оқиға орнына «ССЕР» компаниясының өрт сөндіру командасы, сондай-ақ «Теңізшевройл» компаниясының апатқа қарсы құрамының (ПАС) қызметкерлері мен үш арнайы техникасы жедел жетті», деп хабарлады компанияның баспасөз қызметі.