Атырау облысында 38 мың абонент жарықсыз қалды

Өңірде кеше соққан қатты  дауылды желдің салдарынан мыңдаған адам жарықсыз қалды.

Атырау облысында бір күн бұрын екпіні секундына 23 метрге жеткен дауылдың салдарын жо жұмыстары жалғастырылуда. Желдің кесірінен 16 ауылда апатты жағдайда электр қуаты үзілді.

 «5 наурызда сағат 03:10-дан бастап Атырау облысының Құрманғазы  ауданында қатты жел салдарынан (дауыл екпіні 22-23 м/с-қа дейін) электр қуатының апаттық сөнуі орын алды. Аудан орталығы Құрманғазы, Орлы, Шортанбай, Нұржау, Жаңаталап, Қиғаш, Бірлік, Ақкөл, Мақаш, Дыңқызыл, Теңіз, Сафон, Байда, Көптоғай, Еңбекшіл, Кудряшов ауылдары жарықсыз қалды» деп хабарлайды Атырау облыстық ТЖД.

Жалпы 52 907 абоненттің желіден ажыратылғаны атап өтілді. Қазір 10 жедел-құтқару жасағы жөндеу-қалпына келтіру жұмыстарын жүргізуде.

Қазірдің өзінде Бүркіттер, Шортанбай, ішінара Құрманғазы ауылдары жарыққа қосылған. Қалған елді мекендер, яғни  38 333 абонент әлі күнге дейін жарықсыз отыр.