Атырау облысы әкімінің орынбасары жауапқа тартылуы мүмкін

80 миллион теңгені жымқырды деп айыпталған Атырау облысы әкімінің орынбасары Қайрат Нұрлыбаевқа қатысты іс сотқа тапсырылды.

Ақ Жайық басылымының хабарлауынша, сот алдына әкімнің орынбасарымен бірге «Бұйырған» кооперативінің 55 жастағы директоры Нұрлан Бисембаев шығады. Оларға «Сеніп тапсырылған бөтеннің мүлкін аса ірі мөлшерде ысырап ету немесе жымқыру» баптары бойынша айып тағылып отыр.

Қылмыстық іс 14 томнан тұрады.

Еске салсақ, бұған дейін Нұрлыбаев өзінің қылмыстық іс бойынша жауапқа тартылғаны туралы жазған Ақ Жайық басылымының редакторынан кешірім сұрауын талап еткен. Әкімнің орынбасары олардың үстінен полицияға «кінәсіздік презумпциясы қағидатын бұзғаны үшін», сондай-ақ «қылмыстық процеске қатысушы тұлғаның ар-намысы мен қадір-қасиетін қорлағаны үшін» жауапкершілікке тартуды сұрап шағымданған. Бірақ кейін шенеунік өз арызын қайтарып алған.

Облыс әкімі Махамбет Досмұхамбетовтің айтуынша, оның қарамағындағы қызметкер журналистке тағылған талаптардың негізсіз екенін түсінген.