Атырау көшелерін су басты

Атырауда жаңбыр суы жиналып, жолдар мен көшелерді басып қалды.

Жаңбырдан кейінгі сел әп-сәтте қаланың аулалары мен көшелерін басып қалды. Ауа-райының қолайсыздығы көліктер мен жаяу жүргіншілердің қозғалысына қиындық туғызды. Бұған ашуланған жергілікті тұрғындар жағдайды әлеуметтік желіде бөлісуде. Арнайы автобаза қызметкерлері жұмысқа кірісіп кетті.

Таңертеңгі сағат 10-нан бастап олар көше бойындағы жаңбыр суын соруға кірісті. Жұмыс Сәтбаев, Тайманов, Азаттық, Баймұханов, Амандосов. Авангард шағын ауданы, Сарықамыс, Привокзальная, Сырым Датов көшелерін қамтиды.

«Арнайыавтобаза» ЖШС басшысы Алмас Ізтілеуовтің айтуынша, су тарту жұмыстары жалғасуда.

«Жұмысқа 6 вакуум және 10 жеке шаңсорғыш техника қатыстырылған. Барлығы 16 бірлік техника. Түскі астан кейін бізге «Су арнасы» қосылады»,- деді ол.

Айтпақшы, бүгін атыраулықтар қала күнін тойлап жатыр және оларды бірқатар мәдени шаралар күтіп тұр.

Естеріңізге сала кетейік, қыркүйек айының соңында ауа райының қолайсыздығынан Қарағанды ​​көшелерін су басқан болатын. Әкім бұдан кейін қаладағы  су жүйесі ретке келгеніне сендірді. Көшелерді су басу әдеттен тыс толассыз жауған жаңбыр салдарынан болған.