Атырау қаласы әкімдігі су басқан көшелер үшін жазаланады

Су толып қалған арықтан баланы аман алып қалуға мәжбүр болған ашулы азамат полицияға арыз жазған.

Оқиға 13 ақпанда болған. Мектеп оқушысы дәл қала орталығындағы су басқан арықты байқамай құлап кеткен. Бұл күндері қалың қар жауып, одан кейінгі жаңбырдан кейін қала суға батып қалды. Ал коммуналдық қызметкерлер көшелерді тез арада тазарта алмады.

Қамқор қала тұрғыны қыздың шығуына көмектесіп, тіпті оған жаңа киім алып берді. Сосын Атырау әкімдігінің әрекетсіздігі туралы арыз жазу үшін полицияға барды.

Ал бүгін Атырау полиция департаменті бұл іс бойынша құжаттарды жинау жұмыстары енді ғана аяқталғанын хабарлады.

«Енді қалалық тұрғын үй-коммуналдық шаруашылық бөлімі мен «СпецАвтоБаза» ЖШС-не қатысты тексеру жүргізіледі. Тексеруден кейін кінәлілерге ҚР ӘҚБтК-нің 631-бабына сәйкес айыппұл салынады» деп хабарлады ведомствоның баспасөз қызметі.

Жолдарды күтіп ұстау талаптарын орындамау бабына сәйкес, әкімдікке небәрі 10 АЕК немесе 36 920 теңге көлемінде айыппұл салынады.

Қазір Атырау көшелерінде жүргізушілер қиналып жатыр. Аршылмаған қар мен көктайғақ қалада оқыс оқиғалардың көбеюіне себеп болуда.