Атырау әкімі базарларға «соғыс жариялады»

Бұған дейін көгершіндерге соғыс «жариялаған» Атырау қаласының әкімі Шәкір Кейкіннің көзіне енді қала базарлары түсті.

Үкімет өкілі қаладағы «Дина», «Мұрагер» және «Мерей» базарларын аралап, тұрғындар арасында сұранысқа ие сауда орындарының апатты жағдайда екенін білді.

Дүңгіршектердің заман талабына сай жабдықталмағаны, әлі күнге дейін сатушылар пайдаланып жүрген көне заманнан қалған дүңгіршектер қаланың сыртқы келбетін бұзып тұр.

Әкім қазіргі жағдайға көңілі толмай, қандай шкаламен бағалағанын нақтыламаса да, барлық базарларға төмен баға қойды.

«Неге айнала қар мен мұздан әлі де тазаланбаған? Сіз біреудің құлап, бір жерін сындырғанын күтіп жүрсіз бе? Мен сізден көше тазалауды сұрамаймын. Сіз өз үйіңізді осылай ұстайсыз ба? Барлық нарықтың жағдайы тіпті «үш» те емес, бәріңізге «екі» деген баға беремін»,-  деді Шәкір Кейкін.

Кейкін көктем басталмай жатып айтқан олқылықтардың барлығын шұғыл түрде жоюды, жауапты тұлғаларға жағдайды тұрақты бақылауда ұстауды тапсырды. Ешқандай өзгеріс болмаса, заң аясында шара қолданатынын ескертті.