Атырау әкімдігі қызметкерлері су тасқыны кезінде көлік қарап жүр

Атырау әкімдігінің қызметкерлері салонда көлік қарап жүргені үшін халықтың сынына ұшырады, деп хабарлайды Orda.kz порталы.

Халқы суға батып жатқанда  әкімдіктің қызметкерлері автосалонда көлік таңдап жүрген сәтін жергілікті белсенділер видеоға түсіріп әлеуметтік желіге жариялап жіберген.

Әкімдіктің мәліметінше, олар көлікті жөндеу мақсатында диллерден қосалқы бөлшектердің бағасын білу үшін жүрген.

«8 сәуірде әлеуметтік желілерде Атырау қаласы әкімдігінің қызметкері А.Ибрагимов «Тойота орталығы» автосалонында жұмыс уақытында көлік қарап жүрді деген бейнежазба таралды. Алайда, табиғи және техногендік сипаттағы төтенше жағдайға байланысты жүргізіліп жатқан жұмыстар барысында А.Ибрагимов қала әкімі аппараты іс басқармасының теңгеріміндегі «ТОЙОТА» автокөліктерін жөндеуге қою үшін қосалқы бөлшектерді қарап жүрген уақытында блогер Р.Баязиев қуып жетіп, бейнежазбаға түсірген. Аталған видеодағы қызметкер жазбада айтылғандай әкімнің орынбасары емес. А. Ибрагимов 2024 жылдың қаңтарынан бастап Атырау қалалық тұрғын үй коммуналдық шаруашылығы және тұрғын үй инспекциясы бөлімінің абаттандыру және көгалдандыру секторының бас маманы лауазымын атқарады. Аталған блогер ақпаратты бұрмалау арқылы арандатушылық жасаған. Табиғи сипаттағы төтенше жағдай кезінде өздерін қоғам белсендісі санап жүрген азаматтардың мемлекеттік қызметшілерді әртүрлі арандату арқылы ақпаратты өз пайдасына бұрмалап беру  әрекеттерін құп көрмейтінімізді жеткіземіз», - деді Руслан Жұмағазиев.