Атырауға Африкадан 109 инженер шақырылды

Атырауға  109 африкалық жұмысшы қызметке  орналасу мақсатында келді. Олар мұнай саласында инженер болып жұмыс істейтін болады, деп хабарлайды Orda.kz тілшісі.

Бұл жергілікті тұрғындардың наразылығын тудырды.

Африка азаматтары Атырауға өткен айда келген. Олардың көпшілігі Оңтүстік Африка, Гаити, Нигерия және Зимбабве азаматтары. Олар Атыраудан 30 шақырым жердегі Қарабатандағы зауытта  жұмыс істейді. Африкалықтар Қарабатан компанияларында инженерлік қызметтерді атқарғаны үшін  жоғары жалақы алады.

Алайда Атырау облысына шетелдік жұмысшылардың келуі халық арасында наразылық тудыруда. Африка азаматтарының зауытта жүргенін жергілікті тұрғындар көрген.

— Өз балаларымызға жұмыс табу қиын. Барлық жерде қысқарту жүріп жатыр. Көптеген жергілікті жігіттер Теңізде де жұмыс таба алмай жүр. Біздікілерді жұмысқа алмайды, бірақ басқа елден адам шақырады. Олар қарапайым инженер болып жұмыс істесе де миллионнан астам жалақы алады. Бізде инженерлер таусылып қалды ма? Неліктен жергілікті тұрғындар үшін мансаптық өсу жоқ? Бұл – келеңсіздік», – деп таң қалды жұмысшы Алмас Батырғалиев.

Атырауда жұмыссыздықтың күрт өскенін жергілікті билік те растап отыр. Мәселен, өткен жылы облыста 14 мыңнан астам жұмыссыз тіркелген. Сондай-ақ, еңбек инспекциясы жөніндегі департамент мұнайлы астанада жергілікті жұмысшының шетелдіктен үш-төрт есе аз жалақы алатынын анықтады.

Инспекция жергілікті жұмысшы – бақылаушының жалақысы 750 мың теңге екенін бірнеше рет хабарлады, ал ұқсас лауазымдарда шетелдік жұмысшылар 1,1 миллионнан 3,4 миллион теңгеге дейін, яғни төрт еседей көп алады.

Сондықтан да болар, бұл жолы Қашағанның операторы NCOC африкалық мамандар мен олардың жалақысы туралы сауалға жауап бермеді.

Айта кетерлігі, 2022 жылдың бірінші тоқсанында Теңізде жеті мың адам қысқартылған. Жыл соңына дейін олардың саны 39 мыңға жетуі мүмкін.

Авторы Даниэль Артуров