Атбасар түрмесіндегі азап: Тимур Дәнебаев пен 41 адамды қорлағандар ақталмады

Ақмола облыстық соты Атбасар түрмесінде ондаған тұтқынды ұрып-соғып, азаптады деп айыпталған 12 қызметкерді ақтау туралы үкімнің күшін жойды, деп хабарлайды Orda.kz 

Бұл жөнінде құқық қорғаушы Бақытжан Төреғожина мәлімдеді 

«Азаптағандарды ақтаған үкімнің күші жойылды. Істі бірінші сот сатысына қайта жіберді. Тимур мен өзге жәбірленушілерге жаңа сот талқылауында күш пен төзім тілейміз. Бұл психологиялық жағынан өте ауыр» деп жазды ол.

Жәбірленушілердің арасында «ұлтаралық араздық қоздырған» деген айыппен үш жылға сотталған белсенді Тимур Дәнебаев та бар.

Былтыр күзде Дәнебаев сотта куәлік беріп, түрме қызметкерлері оны қатты ұрып-соққаны соншалық, есінен танып қалғанын айтқан. Дәнебаевтың сөзінше, оны әжетханадағы еденді жууға мәжбүрлеген, бас тартқаннан кейін қатты соққыға жыққан. 

Еуропарламент Орталық Азияға арналған қарарында Тимур Дәнебаевты саяси тұтқындардың бірі ретінде атап, оны босатуға шақырды. Бұған дейін Тимур Дәнебаев Еуропа парламентінен көмек сұраған еді.

Еске сала кетсек, 2022 жылдың 7 қаңтарында президент Қасым-Жомарт Тоқаев ескертусіз оқ атуға бұйрық берді. Кейіннен өз мәлімдемесінде елге «20 мың террорист кіргенін» айтты. Сол жылдың маусым айында бұл көрсеткішті құқық қорғау органдарының бұрынғы басшылары келтіргенін мәлімдеп, мұндай қайғылы оқиға қайталанбайтынына сенімді екенін айтты. Осы Қаңтар оқиғасынан кейін Алматыға «20 мың террорист келгені» жайлы мәлімдемесі үшін президент Тоқаевқа қарсы қылмыстық іс қозғауға тырысқан Тимур Дәнебаев 2022 жылы ұсталып, 2023 жылы маусымда 3 жылға сотталған болатын. Бұған дейін Orda.kz оның ағасы Марат Дәнебаевқа хабарласып, оның түрмеде қандай азап көргенін, қазіргі жағдайы қалай екенін сұрастырған еді.