Атақты кондитердің 600 мыңға бағалаған тортына қатысты сот үкімі шықты

Атақты кондитер Нұршат Әкбергенова мен құрақ-көрпе тігумен танылған блогер Әселина Батыр (Батырбекова) арасындағы атышулы «торт дауы» бойынша сот үкімі шықты, деп хабарлайды Orda.kz.

Бәрі де мерекелік кешке арналған өрнегі бар, жастық пішіндес торттан басталған еді. Тапсырыс беруші Әселина өнімге 600 мың теңге төлей алмай, кейін әлеуметтік желіде кондитерді айыптаған. Бұл оқиға желіде қызу талқыланып, мемдер мен пікірталастарға арқау болды.

Екі айдан астам уақытқа созылған сот отырысына нүкте қойған судья Гүлзада Рашқалиева шешім шығарды.

«Нұршат Әкбергенованың талап-арызы ішінара қанағаттандырылсын. Әселина Батырдан 300 мың теңге қарыз және сотқа кеткен шығындары өндірілсін», деп жазылған үкімде.

Сонымен қатар, блогер 10 жұмыс күні ішінде әлеуметтік желілерде өз сөздерін ресми теріске шығарып, жазба жариялауы тиіс.