Ата-анасының «жаназасына» ақша жинаған астаналық тергеуге алынды

Елордада әріптестерінен жалған түрде ақша жинаған ер адам полицияның тексеруіне алынды, деп хабарлайды Orda.kz.

Деректерге қарағанда, ер адам жұмыстан уақытша босату туралы өтініш жазып, әкесінің қайтыс болғанын айтып, басшылықтан демалыс алған. Сол уақытта әріптестері оған қаржылай көмек көрсеткен.

Бір апта өткен соң ол анасының да дүниеден өткенін хабарлап, тағы да көмек сұраған. Алайда әріптестері күдіктеніп, жағдайды тексеру үшін анасына хабарласқан кезде оның тірі екенін және денсаулығының жақсы екенін білген.

Осылайша ер адамның барлық өтірігі анықталды. Тергеу барысында белгілі болғандай, 20-дан астам қызметкер оның есепшотына әртүрлі мөлшерде ақша аударған, ал ол түскен қаражатты жеке қажеттіліктеріне жұмсаған.

Қазіргі уақытта алаяқтық дерегі бойынша қылмыстық іс қозғалып, тергеу амалдары жүргізілуде.

Айта кетейік, Алматы облысында Қытай елінің туын өртеген 12 адам қамауға алынды.