«Ата-анасының қазасын білмейді»: Ақтөбеде кепілге алынған әйелдің жағдайы белгілі болды

15 қаңтар 2025 16:14 Альфия Адамбек

Коллаж: Orda.kz

Ақтөбеде кепілге алынған 40 жастағы әйел есін жиды, деп хабарлайды Orda.kz Tengrinews.kz-ке сілтеме жасап.

Еске салайық, 13 қаңтар күні белгісіз ер адам әйелді ата-анасымен бірге кепілге алған болатын. Кейін полиция ер адамды ұстады. Жәбірленушілер ауруханаға жеткізілді. Алайда 40 жастағы әйелдің ата-анасы алған пышақ жарақатынан көз жұмды. Мәліметтерге сүйенсек, үш адамды кепілге алған ер адам 40 жастағы әйелдің бұрынғы жігіті болып шықты.

Дәрігерлер қайғылы оқиғадан аман қалған зардап шегушінің жағдайы туралы мәлімет берді. Қазіргі уақытта әйел нейрохирургия бөлімінде, полицияның тәулік бойғы күзетінде жатыр.

Медицина қызметкерлерінің айтуынша, зардап шегушінің жағдайы сәл жақсарғанымен, ол әлі анасы мен өгей әкесінің қайтыс болғанын білмейді.

«Науқастың жағдайы орташа ауыр. Ол оянды, есін біледі. Нейрохирургия бөлімінде палатада жатыр. Әйел көптеген жарақат алған және қатты күйзеліске түскен. Онымен күн сайын психологтар жұмыс істеп жатыр. Ол ата-анасы мен сол күнгі оқиғалар туралы сұрайды, бірақ көп нәрсе айтпаймыз. Тек оған емделу керек екенін, әзірге тұруға және жүруге болмайтынын айтамыз», – деді облыстық көпбейінді аурухананың нейрохирургия бөлімінің меңгерушісі Мақсат Оразжанов.

Әйелдің ұялы телефоны жоқ екен, палатасына ешкімді кіргізуге рұқсат берілмеген. Сондықтан ол жақындарының қайтыс болғанын әзірге білмейді.

Осы уақытта қайғылы оқиға болған үйде зардап шеккен әйелдің ата-анасының жерлеу рәсіміне дайындық жүріп жатыр. Ертең, 16 қаңтарда 67 жастағы әйел мен 74 жастағы ер адам жерленеді. Отбасының туыстары әзірге болған жағдайға түсініктеме бермеді.

Жаңалықтар

барлық жаңалықтар