Ата-анасы 10 жасар қызын сексуалды құлдыққа сатып жіберген

10 жасында ата-анасы жыныстық құлдыққа сатып жіберген Нигора 9 жылдан кейін әрең қашып құтылыпты. Дегенмен оның өмірі әлі де қалыпқа келмеген.

Астана телеарнасының хабарлауынша, қазір ол Шымкенттегі арнайы орталықты паналап отыр.

Өзбекстанда дүниеге келген Нигораны ата-анасы 10 жасында бөтен адамдарға бір мөшек ақшаға сатып жіберген.

«Перзенттің керегі жоқ, ақша керек деді. Әкем нашақор еді, мамам ішеді. «Әке» деп жылап едім, бұрылып қарамады да. Атам мені сатады деген сөзді естігеннен кейін жүрегі ұстап, қайтыс болды. Жалғыз жанашырым сол кісі еді. Одан бері туыстарым да іздеген емес» дейді Нигора.

Қызды сатып алғандар бастапқыда оны Сарыағашқа, артынша Шымкентке әкелген. Бойжеткенді 9 жыл бойы ешкім іздемеген.

Нигораның айтуынша, онымен бірге 20 шақты қыз тұрған. Сатып алушылар оны қараңғы үйден шығармай, жүйелі түрде соққының астына алып, ал азық ретінде қара нан мен су беріп тұрған.

«Аштықтан талай қыз өліп қалды сол жерде. Кейбірін шетелге сатып жіберді. Бізді бір-бірімізбен араластырмайтын. Жыныстық қатынасқа түсуден бас тартсақ, темірмен, шынжырмен ұрып, басыма тапанша тақайтын. Қараңғы қапастағы тіршіліктен жанашыр бір азамат шығуға көмектесті» дейді бойжеткен.

Барар жері, басар тауы болмаған соң бойжеткен екі ай дағдарыс орталығын паналап отыр. Қолында баласы бар Нигораны ұлының әкесі тастап кеткен.

Осы аралықта ол жағдайыңды жасаймын дегенге сеніп, екінші рет құлдыққа түсіп қала жаздағанын алға тартты. Тағы бір адамдар оны малға жегіп қойған. Ол жерден бойжеткенді еріктілер шығарған.

«Баяғы арманы бар-ау деймін. Балалық кезі сексуалдық қатынаста, зорлықта болғаннан кейін өмірде көп нәрсені жоғалтқан. Сол жоғалтқан қасиеттерін қайтадан осы анаға бергіміз келеді. Өйткені ол арманын айта бермейді» дейді «Көмек» орталығының директоры Малика Жүсіпова.

30 жастағы Нигора алғаш рет қолына қалам алып, хат тани бастаған. Қазіргі таңда қыздың ата-анасы іздестіріліп жатыр. Алайда бойжеткеннің өзі оларды көруге құштар емес.

Ол Қазақстанда ұлыммен өмір сүрсем дейді.