Қасым-Жомарт Тоқаевтың досы төбелескен уақыттарын еске алды

Президент Қасым-Жомарт Тоқаевтың досы Андрей Антоненко балалық шақтарын еске алды. «Комсомольская правда Казахстан» газеті кезінде президенттікке үміткердің досынан сұхбат алып, бірқатар естеліктер жариялады.

Ол өзін сыныптан тыс жерде де өте мәдениетті әрі еркін ұстайтын. Сонымен қатар, ер балалардың баршасының басынан өтетін жұдырықтасулардан да қашпайтын. Жомарт барлық мәселені бейбіт жолмен, сөйлесу арқылы шешуге тырысатын. Дипломатиялық шеберлігі сол кезден-ақ көзге ұрып тұратын. Дегенмен, төбелеспеске болмай бара жатса, Тоқаев топ артында тасаланып қалмайтын. Сондай жағдайлардың бірі әлі есімде. Біз мектептен шығып Қарағайлы саябағына барғанбыз. Қарсы келе жатқан топта төрт жігіт бар еді. Әңгіме сол баяғы «Темекі бар ма?» деген сөзбен басталды. Жомарт та бағзы дағдысына басып, тұтанып келе жатқан мәселені бейбіт шешуге тырысып-ақ баққан. Бірақ бұл жолы онысынан түк шықпады, - дейді досы.

Андрей Антоненконың айтуынша, қарсы тараптан бір жігіт соққы жасайды. Президенттің сол сәтте осал болмағанын айтып, жастық шақтарын еске алды.  

Сол жерде біз күтпеген оқиға болды. Қарсы тараптың бір жігіті күтпеген жерден соққы жасап қалды. Жомарт та осал емес екен, сол жолы екі жақ та ауыр жарақатсыз шықтық. Бір сөзбен айтқанда, Тоқаев мінезсіз жігіт емес еді. Оның қанымен келген қасиеті бүгін де бойынан жоғалмағанына сенемін, - деді Антоненко.