Қасым-Жомарт Тоқаев Телерадиокешеннің жаңа студиясымен танысты

Қасым-Жомарт Тоқаев ҚР Президентінің Телерадиокешенінің жаңа аппараттық-студия кешенімен танысты. Бұл туралы Берік Уәли Facebook парақшасында жазды.

– Биыл ҚР Президентінің Телерадиокешеніне 25 жыл. Бүгін Мемлекет басшысы Қасым-Жомарт Тоқаев ТРК-ның жаңа аппараттық-студия кешенін аралап көріп, ұжымды мерейтойымен құттықтады, деді Берік Уәли.

Президенттің баспасөз хатшысының айтуынша, Президент Телерадиокешен жұмысының негізгі нәтижелерімен танысты. Кешен қызметкерлері 800 деректі фильм түсірген. 2019 жылдың 20 наурызынан бері Мемлекет басшысының қызметі туралы 600 сағаттық видеотүсірілім жасап, 56 деректі фильм, 450 видеоролик дайындаған.

Дайын материалдар Telegram және YouTube әлеуметтік желілерінде жарияланған.

Қазір кешен Тәуелсіздіктің 30 жылдығына «Абайдың қара сөздері» және «Қуатты өңірлер – қуатты Қазақстан» деректі фильмін түсіруді жоспарлап отыр.