Қасым-Жомарт Тоқаев: Біз қытай тілін үйренуіміз керек

Мемлекет басшысы «Хабар» телеарнасына берген сұхбатында шеруге шыққандардың арасында есірткі қабылдағандар болғанын айтты.

Қасым-Жомарт Тоқаевтың айтуынша қаралы қаңтарға қарсы атылған оқ өлімге себеп болмайтын дене мүшелеріне тисе де жараланғандар ауырғанын сезінбеген.

– Қазір тергеуде бандиттердің есірткі пайдаланғаны анықталып отыр. Оларда ауырсыну сезімі болмаған. Шешуші кезеңде күш органдары күш қолдана бастағанда, аяғынан ата бастағанда құлаған, бірақ ауырғанын сезбеген. Әдетте жарақат алғандар сезетін ауырсыну болмаған. Бұл жоспарланған операция екенін тағы бір мәрте көрсетіп отыр, - деді президент.

Тоқаев Қытаймен ынтымақтастық, сондай-ақ АҚШ-пен қарым-қатынас туралы пікір білдірді.

– Қытайға келетін болсақ, біздің ең жақын көршіміз екенін түсіну керек. Біз көршілерді ауыстыра алмаймыз. Қытай даму жолында үлкен жетістіктерге жетті. Біз Қытаймен ынтымақтасуымыз керек, Қытай нарығына тәуелдіміз, біздің барлық фермерлер Қытай нарығына қатты сенеді. Осы уақытқа дейін Қытай бізге еш жамандық жасаған жоқ. Қытаймен сауда көлемі 17 миллиард долларға жетті. Біз Қытайды танып, қытай тілін үйренуіміз керек. Бұл қолымызды жоғары көтеріп, беріле салу дегенді білдірмейді. АҚШ-қа келетін болсақ, бұл өте маңызды ел, - деді мемлекет басшысы.