Астық кептіру үшін шаруаларға 67 мың тонна дизель отыны қажет

Ауыл шаруашылығы тауарын өндірушілерге сұйытылған газдың қосымша көлемі де қажет. Бұл туралы Orda.kz  Ауыл шаруашылығы министрлігіне сілтеме жасап хабарлайды.

Алты облыстың – Ақмола, Қостанай, Қарағанды, Шығыс Қазақстан облысы, Солтүстік Қазақстан облысы және Павлодар облыстарының шаруалары кептіру қондырғыларына қосымша 67,7 мың тонна дизельдік отын мен 21,5 мың тонна сұйытылған газ бөлуге 495 өтінім берді. 

Бұл туралы Үкіметте 29 тамызда Серік Жұманғариннің төрағалығымен өткен күзгі дала жұмыстарын жүргізу мәселелері жөніндегі жедел штабтың екінші отырысында белгілі болды, онда астық жинау науқанының ахуалы талқыланды.

Ауыл шаруашылығы вице-министрі Азат Сұлтанов атап өткендей, өңірлерде барлығы 1301 астық кептіру қондырғысы бар, оның 1043-і (80%) дизельдік отынмен, 258-і (20%) сұйытылған газбен жұмыс істейді.

Премьер-Министрдің орынбасары Серік Жұманғарин Энергетика министрлігіне басымдық ретінде өңірлерді дизельдік отынмен және астықты кептіру үшін сұйытылған газбен қамтамасыз етуді тапсырды.

Қазірдің өзінде «ҚазАгроҚаржы» шаруа қожалықтарына кептіргіш агрегаторларды лизингке беру бойынша қажетті шараларды қолға алды. Бірақ оларға әлі өтініш түскен жоқ», деп түсіндірді Ауыл шаруашылығы министрлігі.

Негізгі астық жинау күз бойына созылатынын ескере отырып, өтінімдер уақытылы берілсе, кептіру қондырғылары орақ науқаны қызған шағында тұтынушыларға жетіп үлгереді, деп сендірді ведомство.