Астананың «Big Шанхай» базарындағы өрт сөндірілді

Өрт базар аумағында 30 113 шаршы метрге жайылды, деп хабарлайды Orda.kz.

Өрттің шығу себебі анықталып жатыр. 

«Сөндіру жұмыстары өрттің тез таралуы, жанғыш материалдардың көптігі, қатты түтін, жоғары температура, сауда павильондарының тығыз салынуы және ошақтарға қолжетімділіктің шектеулігімен қиын болды. Өрт жақын маңдағы ғимараттарға таралмады — оны базар аумағында оқшаулап үлгердік»,  деп хабарлады Төтенше жағдайлар министрлігі. 

Өрт 18 шілде күні таңғы уақытта Алаш тас жолында орналасқан базарда тұтанған. ТЖМ мәліметінше, өрт сөндірушілер сауда үйінің терезелерінен қою түтін шығып жатқанын өздері байқаған.

Оқиға орнына алғашқы бөлімшелер жеткен кезде ғимараттың шатыры жартылай опырылып түскен еді.

«Өртті сөндіру жұмыстары жоғары өрт жүктемесі мен қатты түтін әсерінен қиынға соқты. Сағат 07:10-да өрт оқшауланды. Қаза тапқандар мен зардап шеккендер жоқ» деп жазылған ТЖМ хабарламасында. 

Өртті сөндіруге 165 адам мен 62 техника қатыстырылды. 

Алдын ала мәлімет бойынша, өртті сөндіру кезінде үш өрт сөндіруші жарақат алған. Оның біреуі ауруханаға жатқызылды, екеуі алғашқы медициналық көмек көрсетілгеннен кейін амбулаторлық емдеуге жіберілді.