Астаналық мектеп оқушылары бірнеше күнге қашықтан оқытуға ауыстырылады

Еліміздің бас қаласының мектеп оқушылары екі күнге – 13 және 14 қазанда қашықтан оқытуға көшеді. Оның себебін елорданың білім басқармасы бұл күндері Астанада халықаралық саммит өтетіндігімен түсіндреді.

Ведомство 13-14 қазанда Астанада мемлекет және үкімет басшыларының қатысуымен өтетін халықаралық форумдарға байланысты кейбір көшелерде көлік қозғалысы шектелетінін хабарлады. Бұл тәжірибенің көптеген елдерде осындай ірі шаралар кезінде қолданылатыны баса айтылады.

«Жоғарыда айтылғандарды ескере отырып, мектеп оқушылары мен ата-аналарға ыңғайлы болу үшін 13-14 қазанда қала мектептерінде меншік түріне қарамастан, сабақтар қашықтан оқыту форматына ауыстырылады» делінген ведомство хабарламасында.

Қыста қатты аяз бен ауа райының қолайсыздығынан сабақтар көбінесе қашықтан өткізілетіндіктен, оқушылар үшін қашықтықтан оқыту форматы ерекше тосынсый емес екені атап өтілді.

«Барлық елордалық мектептер мұндай сабақтарды өткізуге арналған компьютерлермен қамтамасыз етілген» деп қорытындылады ведомство.

Бұған дейін Ақорда алдағы аптада Астанада Тоқаевтың қатысуымен бірнеше ірі іс-шара өтетінін хабарлаған болатын. Атап айтқанда, Түркия мен Түрікменстан президенттерінің сапары, ТМД Мемлекеттері басшылары кеңесінің отырысы, Орталық Азия-Ресей саммиті және Азиядағы өзара іс-қимыл және сенім шаралары кеңесінің (АӨСШК) VI саммиті күтілуде.