Астаналық әуежайдың экс-қызметкерлері бас бостандықтарынан айрылды

Әуежайдың бұрынғы бас есепшісіне сот ұзақ мерзімді бас бостандығынан айыруды тағайындады.

Есіл ауданының №2 аудандық соты Нұр-Сұлтан халықаралық әуежайының бұрынғы бас есепшісі Бабашеваға алдын ала сөз байласу арқылы бір топ адаммен аса ірі көлемде қаражат жымқырды деген айып тағып, үкім шығарды, деп хабарлайды елордалық соттың сайты.

Сондай-ақ, оның орынбасары Палманова, есепшілер Баяндина, Узденбаева, Илюбаева, «NK Building» ЖШС директоры Сейітова және бас есепші Бабашеваның күйеуі ұрлыққа қатысқаны үшін сотталды.

«Сот жоғарыда аталған тұлғалардың 2016 жылғы маусымнан 2019 жылғы сәуірге дейін 33 заңды бұзып, жеке кәсіпкерлердің есеп айырысу шоттарына жалған келісім шарттар мен қаржылық құжаттар арқылы ақша аударып, оларды кейіннен қолма-қол ақшаға айналдырып, 1,6 миллиардтан астам теңгені жымқырғанын анықтады»,- деп мәлімдеді сот.

Сотталушылардың кінәсі сот-экономикалық сараптама материалдарымен, компания басшыларының айғақтарымен, жасырын тергеу әрекеттерінің материалдарымен және кейбір сотталушылардың мойындауларымен толық дәлелденген.

Сот Қылмыстық кодекстің 189-бабы, 4-бөлігінің санкциясы 7-ден 12 жылға дейінгі мерзімге бас бостандығынан айыру түріндегі мүлкін тәркілеумен және өмір бойына мемлекеттік және басқа ұйымдарда лауазымдарды қызметте болуға тыйым салуды көздейді.

Барлық сотталушыларға бас бостандығынан айыру жазасы тағайындалды:

Бабашева - 11 жыл;

Бабашев - сегіз жыл;

Палманова, Сейітова, Баяндина, Узденбаева, Илюбаева - жеті жыл.

Баяндинаның кішкентай балалары мен Илюбаеваның жүктілігіне байланысты үкімді орындау кейінге қалдырылды.

Сондай-ақ, сотталушыларға ақшалай және материалдық құндылықтардың есепті айналымымен байланысты қызметпен айналысу құқығынан айыру түріндегі 10 жыл мерзімге қосымша жаза қолданылды. Бабашеваға мемлекеттік қызметте лауазым иеленуге де тыйым салынған.

Тергеу барысында қамауға алынған сотталушылардың 20 нысаны (пәтерлер, үйлер, жер телімдері, бес автокөлік) 312 298 000 теңге, сондай-ақ 40,5 миллион теңге сомасындағы қаражат зиянды өтеуге бағытталды.

Үкім әлі күшіне енбеді.