Астанаға келген Лукашенконы Үкімет басшысы қарсы алды

Беларусь Республикасының президенті Александр Лукашенко жоспарланған халықаралық
іс-шараларға қатысу үшін Астанаға келді. Астана әуежайында Александр Лукашенконы ҚР премьер-министрі Әлихан Смайылов күтіп алды.

Астанада Александр Лукашенко Азиядағы өзара іс-қимыл және сенім шаралары жөніндегі VI саммитке АӨСШК бақылаушы мемлекет басшысы ретінде және ТМД мемлекеттері басшылары кеңесінің отырысына қатысады.

Сондай-ақ АӨСШК саммитіне қатысу үшін елордаға Иран Ислам Республикасының президенті Ибрахим Раиси, Тәжікстан Республикасының президенті Эмомали Рахмон, Қытай Халық Республикасы Төрағасының орынбасары Ван Цишань келді.

Айта кетейік, 14 қазан күні елордада ТМД мемлекет басшылары кеңесінің отырысы өтеді, оның аясында ұйым қызметінің негізгі мәселелері талқыланады. Отырысқа Әзірбайжан, Армения, Беларусь, Қазақстан, Қырғызстан, Ресей, Түрікменстан, Тәжікстан және Өзбекстан басшылары қатысады.