«Астанаға жаяу барамын»: Қаңтар құрбанының жесірін біреулер кері қайтарды

Алматы тұрғыны Шапағат Қадырова – 2022 жылғы Қаңтар оқиғасы кезінде оқ тиіп қаза болған Әкімжан Бектұрғанның жесірі. 8 желтоқсанда әділдік талап ету үшін Алматыдан Астанаға жаяу жолға шыққанын айтқан. Алайда жолда біреулер көлікке отырғызып оны Алматыға қайта әкеліп тастады, деп хабарлайды Orda.kz.

Ол Qazaq Times тілшісіне берген сұхбатында төрт жылдан бері күйеуін атқан адамды анықтай алмай жүргенін, барлық мемлекеттік органдардың есігін тоздырғанын айтты.

«Әділдік іздеп шаршадым. «Кім атты?» деп сұрасақ, «әскерилер атқан» дейді. "Президенттің бұйрығы талқыланбайды" деп жауап береді. Сонда күйеуімнің өлімі үшін жауап беретін адам жоқ па? Үш балам әкесін сұрайды. Күйеуімді атқан адамды тауып берсін», – деді ол. 

Жолға қаражаты болмағандықтан, Астанаға жаяу шыққан Қадырованы тасжолда жолай кезіккен бір жүргізуші көлігіне отырғызған. Алайда ол әйелді қайтадан Алматыға алып кеткен.

Шапағат Қадырова «Астанаға енді автобуспен барамын» деген еді. Бірақ сейсенбі күні кешке оған Алматы қаласы әкімдігі хабарласып, шағымы бойынша сөйлесуге шақырған.

Ол енді қала әкімдігі қандай жауап беретініне мән бергісі келетінін айтты.