«Астанадағы жиынға кіргізбеді»: Қазақстанға АЭС салу керек пе?

Астанадағы атом электр станциясын салу мәселесіне арналған ашық жиынға келген қатысушылардың бәрін залға кіргізген жоқ. Олардың бір бөлігі трансляция залына жіберілді.

Orda.kz бұған дейін Алматыдағы АЭС салу мәселесі жайлы жазған болатын. Жалпы Қазақстанда АЭС-ті екі өңірде, Абай облысындағы Курчатов қаласына жақын жерге және Алматы облысының Балқаш маңындағы Үлкен ауылына жақын жерге салу жоспарланып отыр.

«Жиынға кіре алмағандар болды»

Жиын Алматыдағыдай ғылыми лекция форматында басталды. «Қазақстан атом электр станциялары» АҚ бас директоры Тимур Жантикин атом энергиясының пайдасы мен тиімділігі туралы баяндаған кезде, ұйымдастырушылар қатысушыларды екі топқа бөлді.

Orda.kz журналисі БАҚ өкілін залға кіргізбеу себебі туралы түсініктеме алғаннан кейін ғана негізгі залға өтті. Күзет «түсініспестік болды» деп түсіндіріп, негізгі залдың толып кеткенін айтты. Ал зал болса  АЭС-ті қолдайтын плакат ұстаған студенттерге толы екені белгілі болды.

Сонымен қатар, белсенді азаматтық позициясын білдірген қатысушыларды күзет бар күшін салып, кіргізбеуге тырысты. Дәлізде осындай бірнеше оқиға болды.

Залдан қойылған сұрақтардың басым бөлігі Қазақстанда Чернобыль апатының қайталану қауіпі, атом станциясының қоршаған ортаға зияны және ядролық реакторлардың қауіптілігі туралы алаңдайтындарын жеткізді.

«АЭС-тен келетін қауіп»

«АЭС салсақ ұлттық қауіпсіздікке қауіп төнуі мүмкін. Мұндай жоғары қуат көздерін салу қауіпті. Бір зымыран соққысы – жарты елді жарықсыз қалдырады. Оны Украина мысалы айқын көрсетіп берді. Каховка ГЭС-і қиратылды, Запорожье АЭС-і үнемі жарылыс қаупінде тұр. Қазақстанда соғыс болмайтынына ешкім кепілдік бере алмайды. Біз бұл туралы ойлануымыз керек және өзімізді қорғауымыз қажет», — деді сұрақ қоюшы Данияр Қалиев.

Бұл сұраққа «Қазақстан атом электр станциялары» АҚ бас директоры Тимур Жантикин жауап берді.

«Станцияның жарылу мүмкіндігі туралы айтсақ, атом энергетикасының болашағы шағын модульдік станцияларда деп есептеймін. Бүгінгі таңда шағын модульдік станциялардың «референттілік көкжиегі» – 2030 жылдар. Референттіліксіз салу тиімсіз. Сондықтан үлкен станция саламыз, кейін шағын станцияларды дамытамыз», — деді Тимур Жантикин.

АЭС құрылысын жақтаушылар -  жастар

АЭС құрылысының жақтаушылары, негізінен  - жастар, Қазақстанның ғылымын, ядролық физика саласындағы зерттеулерді, жаңа жұмыс орындарын құруды және арзан энергия алу арқылы экономиканың дамуын болжады.

Залда студенттер тек АЭС құрылысына қолдау білдіретін баяндамаларды қошемет көрсетіп отырды.

Еске сала кетейік, Orda.kz тілшісі Алматыдағы дауға толы жиынға да қатысып қайтқан болатын. Отырыс барысында «неге микрофон бермейсіңдер?» деп шулаған адамдар болды. Ақыры АЭС қаупі жайлы сөз сөйлеген энергетик Әсет Наурызбайға және экологиялық мәселелерді айтып дабыл қаққан Мэлс Елеусізовке микрофон берілді. Сондай-ақ, эколог АЭС құрылысы ұзақ уақыт салынатын болса, сол уақыт аралығында жемқорлықтың болуы мүмкін екенін айтты.