Астанадағы Sabis мектебінің ашылу мерзімі белгілі болды

Бұған дейін жалпы инвестиция көлемі 19 миллиард теңге болатын Sabis мектебінің құрылысын биыл аяқтау жоспарланған болатын.

Астанада Sabis халықаралық білім беру брендінің алғашқы мектебі 2024-2025 жылдары ашылады.

Бұл жобаның инвесторы – Emirates Kazakhstan Education Investment Group. Мектеп құрылысын бастау туралы келісімге әкімдік, «Kazakh Invest» компаниясы, БАӘ елшілігі және Neft БК өкілдерінің қатысуымен қол қойылды.

Астанадағы Sabis мектебі тоғыз гектар аумақта орналасып, үш мыңнан астам оқушыны қабылдай алады. Кампуста жеке балабақша ғимараты, кітапхана, театр, жабық жартылай олимпиадалық бассейн, заманауи жабдықталған спорт залы, баскетбол алаңы, ғылыми зертханалар және т.б. болады.

Sabis Қазақстандағы жергілікті және шетелдік студенттерге халықаралық бағдарлама ұсынбақ. Бұл ретте мектеп үштілді болады: оқушылар міндетті түрде ағылшын тілінде білім алумен қатар қазақ және орыс тілдерін де зерттей алады.

Бұған дейін жалпы инвестиция көлемі 19 млрд теңге болатын Sabis мектебінің құрылысын биыл аяқтау жоспарланған болатын, алайда елорда прокуратурасының мәліметінше, уәкілетті орган ұзақ уақыт бойы  осы инвестициялық жобаны жүзеге асыру үшін қажетті су қорғау жүйесін құруға рұқсат бермеген.