Астанадағы Нұрсұлтан Назарбаев аралының жаңа иесі кім?

«Жасыл» аралы Есіл ауданының Есіл өзені бойында орналасқан. Соңғы 20 жыл бойы ол Нұрсұлтан және Болат Назарбаевтардың меншігінде болды. 2022 жылғы Қаңтар оқиғаларынан кейін Нұрсұлтан Назарбаев өз үлесін ұлы Тауманға, ал Болат Назарбаев үлесін ұлы Нұрбол мен қызы Құндызға сыйға тартты. Енді бұл жерлердің иесі өзгерді.

Orda.kz Назарбаевтар отбасының мұрасына қатысты кадастрлық деректерді зерттеді.

2007 жылы әкімдік бұл жер телімін мемлекет басшысына сыйға тартты. 2009 жылы аралдың бір бөлігі інісі Болат Назарбаевқа өтті. 2010-жылдардың басынан арал тәулік бойы полицияның күзетінде.

Аралға апаратын екі ғана жол бар: сол жағалаудағы жол күзетілсе, оң жағалаудан санаулы адамға ғана кіруге болады. Жан-жағы үлкен қоршаумен қоршалған аумақта жеке үйлер, тікұшақ алаңы және жасанды орман бар.

Арал әлі күнге дейін қатаң күзетілуде, бірақ экс-президент отбасы мүшелерінің онда тұрып жатқаны туралы ақпарат жоқ.

Аралдың Назарбаевтар иемденбеген бөлігін ҚР президенті істер басқармасы иеленген.

Дегенмен жақында аралдың бір бөлігі жаңа меншік иесіне өтті. Қоғамдық кадастр картасына сәйкес, Құндыз және Нұрбол Назарбаевтардың үлестері енді «Smart Investment» ЖШС-на тиесілі.

Бұл компанияны «Байтау даму қоры» құрған, ол Нұрсұлтан Назарбаевтың қор құрылымына кіреді. Компания Астанадағы Бірінші Президент кітапханасында орналасқан.

Осылайша, жер телімі қайтадан Нұрсұлтан Назарбаевтың ықпалында қалды.

Кадастрлық карта бойынша учаскенің қалған бөлігі жеке тұлғаға тиесілі. Оның кім екені белгісіз, бірақ бұл тұлға Тауман Назарбаев болуы мүмкін.

Аралдың шығыс бөлігіндегі кадастрлық деректер картадан алынып тасталған. Бұрын ол президент Істер басқармасына тиесілі деп көрсетілсе, қазір кадастрлық нөмір де жоқ, иесі белгісіз.