Астанадағы көлік ұтысы алаяқтық болып шықты

Астанадағы көлік ұтысы алаяқтық болып шықты, деп хабарлайды елордалық полиция департаментінің (ПД) баспасөз қызметі.

«Алаяқтықтың құрбаны болған елорда тұрғыны полицияға арызданған. Тергеу барысында Алматы аудандық криминалдық полиция басқармасының қызметкерлері  21 және 22 жастағы үш адамды анықтады. Интернет-дүкеннің тұтынушылар базасына қол жеткізген соң, өздерін дүкен қызметкері ретінде таныстырған жастар тұтынушыларға телефон соғып, автокөлік ұтып алғандарын хабарлады. Бірақ оны алу үшін комиссия ретінде белгілі бір соманы салу керектігін жеткізген. Бұған сенген жәбірленуші 420 мың теңгеден астам сомаға ақша жіберген, шын мәнінде ешқандай ұтыс болған жоқ»  делінген  хабарламада.

Бұл іс бойынша күдіктілерге бес интернет-алаяқтық іс бойынша айып тағылып отыр.

«Барлық фактілер алаяқтық бойынша тексерілуде. Олардың  елордада осыған ұқсас қылмыстарды жасауға қатысы бар, жоқтығы анықталуда»  деп қосты ПД.