Астанадағы Болат Назарбаевтың қонақасына экс-атқамінерлерден кімдер барды?

Қазақстанның бұрынғы шенеуніктері Астанада экс-президент Нұрсұлтан Назарбаевтың ағасы Болат Назарбаевтың қонақасына  қатысты, деп хабарлайды агенттік тілшісі.

Еске алу шарасына бұрынғы жоғары лауазымды тұлғалар Даниал Ахметов, Ахметжан Есімов, Өмірзақ Шөкеев, Қайрат Қожамжаров, Қайырбек Сүлейменов,  Қалмұхамет Қасымов, Қуаныш Сұлтанов тағы басқалары қатысты.

Шара іргетасын экс-президент Назарбаевтың өзі  қалаған Республикалық бас мешітте өтті. Ол кісі осы мешіттің салынуына қаржы бөліп, құрылысын да өзі қадағалап отырған.

Еске алу рәсімінен кейін экс-шенеуніктер журналистердің сұрақтарына жауап бергісі келмей, қашқақтады. Қаралы жиында журналистер де олардың артынан қуа жөнелмеді.

Айта кетерлігі, шараға Болат Назарбаевтың әпкесі Әнипа Назарбаева мен Нұрсұлтан Назарбаевтың қызы Дариға Назарбаева да қатысты.