Астанадағы аэродром маңында болған авиациялық оқиғадан екі адам қаза тапты

Астанадағы аэродром маңында болған авиациялық оқиға салдарынан екі адам қаза тапты, деп хабарлайды ҚР Көлік министрлігінің баспасөз қызметіне слтеме жасап Orda.kz.       

«2025 жылғы 22 маусым күні шамамен 11:30 кезінде Астана қаласындағы Жоламан аэродромы маңында оқу-жаттығу ұшуын орындау барысында TL-2000 жеңіл моторлы әуе кемесімен авиациялық оқиға орын алды. Әуе кемесі жеке тұлғаға тиесілі. Алдын ала мәліметтер бойынша, бортта екі экипаж мүшесі болған, екеуі де қаза тапқан» деп жазылған жексенбі күні таралған хабарламада. 

Хабарламада көрсетілгендей, азаматтық және эксперименттік авиациялық оқиғалар мен жағдайлар туралы деректерді ұсыну және тергеу қағидаларына сәйкес аталған оқиғаны тергеу үшін комиссия құрылып жатыр.

«Қазақстан Республикасы Көлік министрлігінің көліктегі оқиғалар мен жағдайларды тергеу департаментінің қызметкерлері апат болған жерге бару үшін жолға шықты» деп жазылған хабарламада.