Астанадағы пантеонға президенттердің туыстары жерленбейді

Open NPA порталында Ұлттық пантеон туралы ережеге өзгерістер енгізу туралы үкімет қаулысының жобасы жарияланды.

Orda.kz бұған дейін қазақ элитасын жерлейтін орын туралы айтқан болатын. 2000 жылы Тұңғыш Президент Нұрсұлтан Назарбаевтың бастамасымен елордадан 17 шақырым жерде Қабанбай батыр атындағы кесене бой көтерді. Ал 2017 жылы оның айналасында Ұлттық пантеон салына бастады. Дәл осы жерде Қазақстан Республикасының президенттері, олардың отбасылары және Қазақстанның басқа да көрнекті қайраткерлері жерленетін болған.

24 наурызда Open NPA порталында Ұлттық пантеон аумағындағы жерлеуге қатысты жаңа құжат жарияланды. Қазақстан президенттерінің отбасылары мен «Қазақстан Республикасының Тұңғыш Президенті – Елбасы Нұрсұлтан Назарбаев» ордендері бар азаматтар бұл тізімнен ғайып болды.

Енді пантеондағы орынға төмендегілер үміттене  алады:

1. Қазақстан Республикасының Президенттері,

2. Премьер-министрлер мен олардың орынбасарлары, парламент палаталары төрағалары мен олардың орынбасарлары, мемлекеттiк кеңесшiлер, Президент Әкiмшiлiгiнiң басшылары, Конституциялық Соттың, Жоғарғы Соттың және Ұлттық Банктiң төрағалары;

3. Министрлер, Президентке тiкелей бағынатын және есеп беретiн мемлекеттiк органдардың басшылары, облыстардың, республикалық маңызы бар қалалардың және астананың әкiмдерi;

4. «Халық қаһарманы» және «Қазақстанның Еңбек ері» атақтарымен марапатталған тұлғалар,

5. Үш дәрежелі «Алтын Қыран», «Отан» және «Еңбек даңқы» ордендерімен марапатталған азаматтар;

6. «Кеңес Одағының Батыры» және «Социалистік Еңбек Ері» атақтарымен марапатталған азаматтар,

7. «Қазақстанның Ғарышкер-ұшқышы» құрметті атағы берілген азаматтар,

8. Президенттің арнайы шешімімен өзге де азаматтар,

9. Пантеонға жерлеуге жататын адамдармен бірге олардың қайтыс болған (қаза тапқан) жұбайлары жерленуі мүмкін.

Пантеонға қанша қаржы жұмсалды?

Құрылыстың бірінші кезегі 812 миллион теңге болды. Тағы 11 миллион теңге техникалық қадағалауға жұмсалды. Белгілі бір себептермен екінші кезең  болған жоқ. Мемлекеттік сатып алулар сайтында «ASTANAVODSERVICE» ЖШС атынан мердігерге небәрі 227 миллион теңге төленгені жазылған.

Бұл ретте ескерткіштер өндірісі жалпы құннан, яғни көрсетілген –  812 миллион теңгеден бөлек. Бұл сомаға 2000 жылы бой көтерген Қабанбай батыр кесенесі де кірмеген. 15 ескерткішті жасау үшін дәл сол мердігер тағы 200 миллион теңге алған.

Ескерткіштер

COVID-19 індетіне байланысты қызмет көрсетуші Қытайдан материалдарды дер кезінде алмағандықтан, бар болғаны жеті ескерткіш орнатылған. Мердігер ол үшін 2021 жылы 93,34 млн теңге алған. Нәтижесінде Астана қаласының біріккен музейлері дирекциясы мердігерден 1,6 миллион теңге айыппұл өндіру, сондай-ақ ЖШС-ны мемлекеттік сатып алудың жосықсыз қатысушысы деп тану үшін сотқа шағым түсірді. Нәтижесінде коммуналдық кәсіпорын ақшаны алды, бірақ «ASTANAVODSERVICE» компаниясы тендерлерге қатысуын жалғастыра берді. ҚҚС қоса алғанда, жұмыс елорда бюджетіне 1 млрд теңгеге түскенімен, мердігер 400 млн теңгеге жуық қаражатты алған.