Астанадағы LRT құрылысын жалғастыруға 50 млрд бөлінді

ҚР Премьер-Министрінің орынбасары Алтай Көлгінов жеңіл рельсті көлік жүйесі құрылысын қадағалай ма? Бұл сұрақпен журналистер Астананың бұрынғы әкіміне жүгінді.

- LRT жобасы менің құзыретіме кірмейді, мен жетекшілік етпеймін. Бұл әкімнің құзырындағы мәселе. Осы жұмысты атқарып жүргенде талай рет сөйлеп, хабардар еттім. Бұл жобаға 50 млрд теңгеге жуық қаржы бөлінген. Қала әкімдігі жұмысын жалғастыруда. Инженерлік желілерді алып тастау, арқалықтарды, құрылымдарды, құрылыс құрылымдарын дайындау жұмыстары бар, - деді Алтай Көлгінов Үкімет отырысында.

Оның айтуынша, қыста құрылыс қарқыны төмендейді, мұны түсіну керек.

- Бұл жерде ең бастысы, бөлінген қаржы бақылауда. Қытай консорциумының қарыздары болды, кейбірі жабылды. Жылжымалы құрамға тағы да төлем жасалды, жұмыс жүріп жатыр, жұмыс жүре бастады. Бұл жобаны аяқтау керек, - деп толықтырды Премьер-Министрдің орынбасары.

Бұған дейін әлі елорда әкімі болып тұрғанда Алтай Көлгінов бұл нысанның құрылысын аяқтау үшін 577 млн доллар қажет екенін, қазіргі қарқынмен 260 млрд теңгеден асатынын айтқан болатын.