Астанада тоқтатылған рейстер құны қайтарылады - Көлік министрлігі

Көлік министрлігі әуе компанияларына ауа райының қолайсыздығына байланысты тоқтатылған рейс билеттерінің толық құнын жолаушыларға қайтаруды тапсырды, деп хабарлайды Orda.kz.

Көлік министрлігінің баспасөз хатшысы Жанжігіт Омарханның айтуынша, билет құнын толық қайтару үшін тұтынушылар әуе компаниясына хабарласуы қажет.

«Мұны екі жолмен жасауға болады: телефон арқылы немесе Астана әуежайы ғимаратында орналасқан авиатасымалдаушылар кеңселеріне бару керек», - деді Омархан.

Баспасөз хатшысы қарлы боранға байланысты тоқтатылған рейстер құнын қайтаруды авиакомпания сайттары мен мобильді қосымшалар арқылы беруге болмайтынын, өйткені онда айыппұлдар мен алымдар көрсетілетінін, сондықтан билет үшін қайтарылған сома толық  болмайтынын атап өтті.

Сондай-ақ, министрлік өкілі кеше кештен бері көлік министрі Марат Қарабаевтың Астана әуежайында екенін айтты. Ол рейсін күтіп отырған жолаушылармен сөйлесіп, әуе көлігіндегі жағдайды реттеу үшін жедел штаб құруды тапсырды.

«Кеше авиакомпаниялармен кездесу өтіп, онда жолаушыларды жөнелтуге және ұшып-қонудың бұзылған кестесін оңтайландыруға қатысты бірқатар шешімдер қабылданды. Нәтижесінде жағдай реттелді, әуежай түннен бері келген ұшақтарды қабылдап, рейстерді қалыпты режимде қамтамасыз етуде» деп жазды баспасөз хатшысы.

Естеріңізге сала кетейік, 30 желтоқсанда Астана халықаралық әуежайы күрделі ауа райына байланысты бірнеше сағатқа жабылған болатын. 30-дан астам рейс кейінге қалдырылды. Кейін 10 рейс тоқтатылғаны белгілі. Түнде әуежайда 2,5 мың адам ұшу уақытын күтіп тұрғаны хабарланды.