Астанада құжаттарды өздігінен рәсімдейтін терминал орнатылды

Қазақстандықтар енді кезекте сағаттап тұрмай қызметке тапсырыс бере алады, сонымен қатар жақсы шыққан суретті құжатқа өз бетінше таңдай алады.

Елордадағы халыққа қызмет көрсету орталығында құжаттарды өздігінен рәсімдеуге арналған терминал орнатылды. Инновациялық жоба Цифрлық даму, инновациялар және аэроғарыш өнеркәсібі министрі Бағдат Мусин мен Ішкі істер министрі Марат Ахметжановқа таныстырылды, деп хабарлайды Orda.kz «Азаматтарға арналған үкімет» мемлекеттік корпорациясына сілтеме жасап.

Бұл құрылғының көмегімен кез келген азамат төлқұжат немесе жеке куәлік алуға өз бетінше өтініш бере алады.

Терминал мыналармен жабдықталған:

• Ішкі істер министрлігінің деректер базасында бар фотосурет негізінде адамды автоматты түрде биометриялық сәйкестендіруге және суретке түсіруге арналған камералар;

• қолтаңба сканері;

• Мемлекеттік баж салығын төлеу QR коды (2023 жылы төлқұжат дайындау үшін – 27 600 теңге, жеке куәлік үшін – 690 теңге).

Терминалды пайдалану үшін барлық деректерді толтырып, биометриялық сәйкестендіруден өтіп, суретке түсіп, қол қойып, QR коды арқылы қызмет ақысын төлеу керек.

Өтініш бергеннен кейін көші-қон қызметінің қызметкеріне хабарласу қажет, ол ақпараттың дұрыстығын тексереді. Процесс бірнеше минутқа созылады. Бұрын халықты құжаттандыру кезінде бұның барлығы тек қолмен толтырылатын.

— Бұған дейін өтініш беру үшін клиент 30 минутқа дейін кезекте тұруға, көші-қон қызметкеріне тіркелуге, кассаға ақша төлеуге және суретке түсуге жұмсалатын. Енді құжаттама терминалының арқасында процесс 10 минуттан аспайды, кезек күтпейсіз, - деп атап өтті Мусин.

Оның айтуынша, азаматтар уақытты үнемдеумен қатар, құжатты өз бетінше жасап, жақсы суреттерін де  таңдай алады.

Мемлекеттік корпорацияның басқарма төрағасы Сүйеніш Әбділдин терминалды әзірлеу кезінде барлық тәуекелдер ескеріліп, ақпараттық қауіпсіздік пен жеке деректерді қорғау қамтамасыз етілгенін атап өтті.

Мекеме төлқұжат пен жеке куәлік алу қызметі Қазақстандағы ең танымал қызметтердің бірі екенін еске салады. 2022 жылы оны 2,3 миллионнан астам азамат алған.

Бүгінгі күні Астана қаласының халыққа қызмет көрсету орталықтарында осындай төрт терминал бар. Алдағы уақытта олар барлық өңірлерде пайда болады.