Астанада өрт салдарынан 23 тұрғын үй жарықсыз қалды

23 тұрғын үй кешені қуат алатын  қосалқы стансадан өрт шықты.

Астанада қосалқы стансадағы өрт салдарынан 23 тұрғын үй кешені электр желісінен ажыратылды.

«26 наурызда сағат 08.20-да 110/10 кВ «Заречная» қосалқы стансасында 10 кВ секциялық ажыратқыш ұяшығы өртенді. Соның салдарынан №1 және №2 күштік трансформаторлардың апатты сөнуі орын алды. Сағат 09.40-та өрт оқшауланды. Технологиялық бұзушылықтың себептері анықталуда»  деп хабарлайды «Астана-РЭК» АҚ.

Байтұрсынов, Момышұлы, Керей Жәнібек Хандар, Бөкейхана, Түркістан, Мәңгілік Ел көшелерінің бойындағы тұрғын үй кешенінде, сондай-ақ Тельман ауылының бірнеше көшесінде электр жарығы уақытша өшірілгені атап өтілді. Мамандар жанып жатқан қосалқы стансадағы жабдықтарды толық тексергеннен кейін электр қуатын қалпына келтіруге уәде беріп отыр.