Астанада лифт ішінде пышақталған балаға ота жасалды

Астана қаласында тұрғын үй кешендерінің бірінде лифт ішінде беті пышақталған 5 жасар балаға ота жасалды. Баланың жалпы жағдай ауыр, деп хабарлайды Orda.kz.

Ол №2 көпсалалы қалалық балалар ауруханасының жақ-бет хирургиясы бөліміне жатқызылды. Бала бетінің жұмсақ тіндеріне көптеген кесілген жарақат алғандықтан, жалпы жағдайы ауыр деп бағаланады. Дегенмен отадан кейінгі жағдайы тұрақты, өміріне қауіп жоқ.

Айта кетейік, бұған дейін Астанада лифт ішінде психоневрологиялық диспансерде есепте тұрған 14 жастағы жасөспірім 5 жасар баланың бетіне пышақ жарақатын салғанын жаздық.

Астана қалалық полиция департаменті оқиға бойынша қылмыстық іс қозғап, шабуыл жасаған жасөспірім қажетті тергеу амалдары жүргізілгеннен кейін заңнамаға сәйкес оқшауланатынын мәлімдеді.