Астанада қаржы пирамидасын ұйымдастырғандар сотталды

Астанада «Жұлдызай» және «Аяулым» қаржы пирамидаларын ұйымдастырғандарға үкім шықты, деп хабарлайды Orda.kz. 

Тергеп-тексеруді қаржылық мониторинг агенттігінің Астана қаласы бойынша департаменті жүргізді. 

Тергеу барысында күдіктілер өздерін әлеуметтік желілерде табысты кәсіпкер ретінде таныстырып, азаматтарға тендерлерге қатысу арқылы тез табыс табу схемасын ұсынғаны анықталды. Олар инвестицияның ең төменгі қаражаты 1 млн теңгеден басталып, 40 күн ішінде ұсынылған табыс 90%-дан асатынын айтып сендірген. Нәтижесінде қаржы пирамидасына 60 адам тартылып, жалпы шығын 490 млн теңгеден асты.

Сонымен қатар күдіктілердің бірі салымшылар қаражатына елордадан премиум санатындағы құны 69,5 млн теңге тұратын пәтер сатып алып, әйелінің анасының атына рәсімдеген. 

Тергеу барысында күдіктілер жәбірленушілерге 72 млн теңге көлемінде шығынды өтеді.

Сот үкімімен қаржы пирамидасын ұйымдастырушылар 5 жылдан 7 жылға дейін бас бостандығынан айыру жазасы тағайындалды.