Астанада ірі өрт шығып, көліктер мен жанар-жағармай қоймасы өртенді

Астанада Сарыарқа ауданында ірі өрт болды. Ангардың ішінде тұрған жанармай таситын көліктер, жеңіл көлік және жанар-жағармай сақталған ыдыстар отқа оранған, деп хабарлайды Orda.kz Астана қалалық ТЖД-ға сілтеме жасап.

Ведомствоның мәліметінше, өрт туралы хабар 112 пультіне түскеннен кейін оқиға орнына Төтенше жағдайлар министрлігінің күштері күшейтілген шақырту дәрежесі бойынша жіберілген.

Оқиға орнына жеткен алғашқы бөлімдер ангардың толықтай жалынға оранғанын анықтады. Өртті үйлестіру үшін арнайы штаб құрылып, төрт жауынгерлік учаске ұйымдастырылды. Сондай-ақ суды үздіксіз беру қамтамасыз етілді.

Өртті сөндіру жұмыстары ангар ішіндегі жанғыш материалдардың көп болуына байланысты күрделене түсті.

Өрт сөндіру және авариялық-құтқару жұмыстарын ұйымдастыру басқармасының басшысы Саят Қажымовтың айтуынша, ангар ішінде үш бензовоз, бір жеңіл автокөлік және жанар-жағармай құйылған сыйымдылықтар болған.

Алдын ала мәлімет бойынша, өрт салдарынан қаза тапқандар мен зардап шеккендер жоқ. Қазіргі уақытта өрттің шығу себебі анықталып жатыр.

Оқи отырыңыз:

• Алматыдағы сел қаупі, елдегі жауын-шашын: Бектенов шұғыл кеңес өткізді
• Таразда жер сілкінісі сезілді