Астанада дзюдодан әлемдік турнир өтеді

10-12 мамыр аралығында Астанада дзюдодан Qazaqstan Barysy Grand Slam әлемдік рейтингтік турнирі өтеді. Бұл старт дзюдошыларға 2024 жылы Парижде өтетін жазғы Олимпиада ойындарына қатысу үшін қажетті ұпайларды әкелетін «Үлкен дулыға» сериясының соңғы кезеңі болмақ.

Әлемдік турнир Жақсылық Үшкемпіров атындағы Жекпе-жек сарайында өтеді. Qazaqstan Barysy Grand Slam турниріне 60-тан астам елдің спортшылары қатысады деп күтілуде, оның ішінде Жапония, Оңтүстік Корея және Франция сияқты әлемдік рейтингтің көшбасшылары бар.

Осы жарыстың қорытындысы бойынша IJF ережелеріне сәйкес әлемдік және олимпиадалық рейтингтердегі ұпайлар турнир жеңімпаздары мен жүлдегерлері арасында бөлінеді. Атап айтқанда, бірінші орынға 1000 ұпай, екінші орынға 700 ұпай, үшінші орынға 500 ұпай беріледі.

 Естеріңізге сала кетейік, 2023 жылы Қазақстан Республикасының Дзюдо федерациясы Халықаралық дзюдо федерациясымен (IJF) «Үлкен дулыға» әлемдік сериясының жарыстарын Қазақстанда өткізу туралы төрт жылдық келісімшартқа қол қойған болатын. Екіжақты келісімге сәйкес, біздің ел бұл турнирді 2026 жылға дейін қабылдайды.