Астанада досын құтқаруға дер кезінде көмек шақырған 7 жасар бала марапатталды

Астанада досының суға батып бара жатқанын көріп, балықшыларды көмекке шақырып үлгерген 7 жастағы Пусь Дархан марапатталды.

Сондай-ақ суға батып бара жатқан баланы құтқарған батырлардың бірі балықшы Әбдужапбар Әбдірайымовқа да бағалы сыйлық – "қол сағаты" табыс етілді. Бұл оқиға бойынша "102" жедел арнасына Есіл өзенінің жағалауында балықшылар кәмелетке толмаған баланы судан алып шыққаны туралы хабар түсіп, жедел түрде автопатруль жіберілген.

Түскі астан кейін 7 жастағы бала досымен жағалау бойымен серуендеуге барып, олар ойнап жүріп мұзға шыққан. Бір кезде мұз жарылып, балалардың бірі суға түсіп кеткен. Жақын жерде балықшыларды көрген бала оларға жүгіріп барып, болған жағдайды айтып көмек сұраған.

Әп-сәтте суға батып бара жатқан балаға балықшылар дереу жетіп, құтқарып қалған. Қазіргі уақытта баланың жағдайы жақсы.