Астанада болған екпінді желден кейін бірнеше адам жедел жәрдемге жеткізілді

Астанада қатты желден кейін кейбір азаматтар қалалық ауруханаларға медициналық көмекке жүгінді.

Осылайша, елорда әкімдігінің хабарлауынша, жедел жәрдем бригадалары түрлі дене жарақаттарымен төрт адамды қалалық ауруханалардың жедел жәрдем бөліміне жеткізді. Бұл негізінен көгерген, сырылған  жерлері бар адамдар. Бір бала өкшесінің жабық сынығымен түсті.

«Барлық науқастардың жағдайы қанағаттанарлық, реанимацияға түскен науқастар жоқ. Науқастардың бір бөлігі аурухананың медициналық қызметкерлері тексергеннен кейін,  асқыну болмағандықтан амбулаторлық емдеуге шығарылды» делінген хабарламада.

Кейбір қала тұрғындары жедел жәрдеммен медициналық көмек алған соң, жедел жәрдем бөлмесіне жеткізуден бас тартып, тұрған жерлерінде қалды.

Ауа-райының нашарлауына, атап айтқанда оңтүстік-батыстан соғатын желдің екпіні 15-20, кей уақытта 23 м/с күшеюіне байланысты қаланың коммуналдық қызметтері  жел салдарынан  болған қирандыларды жинауда.

18 қарашада Астананың Төтенше жағдайлар департаменті елорда тұрғындары мен қонақтарын ауа райының қолайсыздығынан үйден шықпауға шақырды, сондай-ақ көшеге шығуға мәжбүр болғандарға нұсқау берді.