Астанада бір күнде есірткі тасымалдады деген күдікпен бес адам ұсталды

Астанада бірден бес адам есірткі саудасымен айналысты деген күдікпен ұсталды, деп хабарлайды ҚР ІІМ ресми интернет-ресурсы.

«Бір күнде елордада есірткі сатумен және сақтаумен айналысқан бес азамат ұсталды»  делінген сенбі күні таратқан хабарламада.

Осылайша, ақпаратқа сәйкес, «полицейлер елордада есірткі жеткізіп, сатумен айналысқан қылмыстық топтың әрекетіне тосқауыл қойған».

«Топты ұйымдастырушы бұрын сотталған 37 жастағы ер адам. Пәтерді тінту кезінде одан  сатуға дайындалған 8 келі оралған гашиш, электронды таразылар, сыдырма құлыптар және 450 мың теңге тәркіледі. Сонымен қатар есірткі заттарын сақтап, қаптап, сатумен айналысқан қылмыстық топтың тағы да басқа мүшелері ұсталды» делінген хабарламада.

Тәртіп сақшылары есірткі саудасына қатысы бар деген айып тағылған тағы екі адамның ұсталғанын хабарлады.

«Операция нәтижесінде полицейлер заңсыз айналымнан 23 келіге жуық, яғни 46 мыңнан астам бір реттік есірткіні тәркіледі. Қазіргі уақытта ұсталғандардың үстінен қылмыстық іс қозғалды. Барлық ұсталғандар уақытша ұстау изоляторына қамалды, тергеу амалдары жүргізілуде»  делінген полиция мәліметінде.