Астанада балалар пансионаты дінді насихаттады деген күдікке ілінді

Астанада балаларға арналған пансионаттар діни артықшылықты насихаттады деген күдікке ілінді, деп хабарлайды Ішкі істер министрлігінің ресми интернет-ресурсы.

«Астана қалалық полиция департаменті аз қамтылған отбасы балаларына арналған пансионаттар атын жамылып елордада жұмыс істейтін қоғамдық қайырымдылық қорлары діни артықшылықты насихаттады деген күдікпен қылмыстық істі тергеп жатыр»  делінген хабарламада.

Полицейлер қор қызметкерінің басқа конфессияларды ұстанатындардың діни сезімдері мен ұлттық дәстүрлеріне тікелей нұқсан келтіретін ашық уағыздар жүргізгенін анықтады.

Заңды бұзып, балалар арасында шетелдік уағызшылардың діни түсіндірмелері  таратылған.

«Интернаттарда жүргізілген тінтулер діни сипаттағы шетелдік оқу материалдарының барын, сондай-ақ балалардың діни жоралғыларға жүйелі түрде тартылғанын растады. Бұл рәсімдердің табиғаты балаларды қазақстандық қоғамның ұлттық дәстүрлері мен құндылықтарынан алшақтатуға бағытталған»  деді полиция.

Қазіргі уақытта сотқа дейінгі тергеп-тексеру жалғасуда, басқа мәліметтер жария етуге жатпайды.