Астанада автобус апатынан екі аяғынан айырылған 8 жастағы Алуаның алғашқы қадамы

Астанада автобус апатынан кейін екі аяғынан айырылған 8 жастағы Алуа Бекен протезбен жүруді үйреніп жатыр, деп хабарлайды Orda.kz.

Қыз баланың алғашқы қадамдары оңалтуға қаражат жинауға арналған Instagram парақшасында жарияланды. Видеода Алуа жаңа протездерін киіп, жүруге тырысып жатқан сәт көрсетілген.

2025 жылдың қыркүйегінің басында техникалық оңалту құралдарын іріктеу орталығы Алуаның протез дайындау процесі енді басталғанын хабарлаған болатын. Қыз балаға немістің Ottobock протез-ортопедиялық концернінің құрылғысы орнатылған.

Еңбек және халықты әлеуметтік қорғау министрі Светлана Жақыпова қыз баланың протездеу және оңалту шығындарын мемлекет өз мойнына алғанын мәлімдеген.

Еске салайық, 2 маусым күні Астанада болған жол апатынан қоғамдық көліктегі 15 адам жарақат алған. Бағанаға соғылған автобустың жүргізушісі қамауға алынған.