Астанада алимент төлемегені үшін көліктер тәркіленді

Астанада алимент бойынша берешегі бар борышкерлер анықталып жатыр - бірнеше адамның көліктері қамауға алынып, аукционға қойылды деп хабарлайды ҚР Әділет министрлігіне сілтеме жасап Orda.kz.

Ведомствоның мәліметінше, биылғы жылдың 4-5 наурызында Астана қаласы Әділет департаменті елордалық ПД жеке сот орындаушыларының өңірлік палатасымен бірлесіп, алимент өндіріп алу бойынша атқарушылық іс жүргізуде мәжбүрлеу шараларын қолдана отырып, «Борышкер» рейдтік іс-шараларын жүргізді. Қызметкерлер алимент бойынша берешегі бар борышкерлердің көліктерін анықтау шараларын жүргізді.

Нәтижесінде 857 160 теңге, 1 518 626 теңге, 2 483 773 теңге және 2 943 979 теңге қарызы бар борышкерлердің 4 автокөлігі қамауға алынды. Жеке сот орындаушылары аталған көліктерді бағалап, аукционға шығару жұмыстарын жүргізіп жатқаны баса айтылды.

Айта кетейік, биылғы жылдың ақпан айының соңында 15 мың қазақстандық алимент төлемегені үшін елден шыға алмай, 6 мыңнан астам азамат әкімшілік жауапкершілікке тартылған.

Көбінесе қазақстандықтардың алимент төлемеуінің басты себебі – қызмет, жұмыстың немесе тыйым салуға болатын мүліктің болмауы.Төлемнен жалтарғандар сотта көбіне осындай сылтаулар айтады.