Астанада алаяқ салымшылардың 11 млрд теңгесін жымқырған

Еліміздің астанасында салымшылардың ақшасын, нақтылай айтқанда 11 млрд теңгені қалтаға басқан алаяққа қатысты үкім шықты. Оған алты жыл бас бостандығынан айыру жазасы тағайындалды.

Үкімді №2 Сарыарқа аудандық соты тұрғын үй құрылысы саласындағы алаяқтық фактісі бойынша шығарған. Үш жыл ішінде (2013-2016) арам пиғылды азамат серіктестерімен бірге 895 салымшыны алдаған. Залалдың жалпы сомасы 11 млрд теңгеден асты.

Сотталушы кінәсін мүлде мойындамады. Ер адамның үш жас баласы бар екенін ескере отырып, сот жеңіл жаза түріндегі шара қабылдаған.

«Жеңілдететін және ауырлататын мән-жайлардың болуын ескере отырып, сот сотталған адамға құрылыста әкімшілік-өкімдік функцияларды орындауға байланысты қызметпен 5 жыл мерзімге айналысу құқығынан айыра отырып, 6 жыл бас бостандығынан айыру түріндегі жаза тағайындады» деп үкім шығарды сот.

Сот үкімі әлі заңды күшіне енген жоқ.