Астанада Абай өмірінің соңғы күндері туралы фильмнің тұсауы кесілді

Елордада «Абайдың соңғы күндері» атты тарихи-деректі фильмінің алдын ала көрсетілімі өтті. Фильм ұлы ойшылдың өмірінің соңғы 40 күні туралы баяндайды, ол туралы қазіргі көрермендер аз біледі.

Фильм «Хабар» агенттігінің тапсырысымен түсірілген. Оның авторлары – жазушы-журналист Қанат Тілеухан мен әдебиеттанушы-публицист Бағашар Тұрсынбайұлы. Фильмнің режиссері – Қазақстан Жазушылар одағының мүшесі Бекзат Смадияр, продюсері – ақын Серік Қалиев.

— Ойшыл өмірінің бір ғана кезеңін көрсеттік. 1904 жылы Абайдың сүйегі Балашақпақ жайлауынан оралды. Уәсил Мағауияқызының айтуынша, Абайдың өмірі Балашақпақ маңындағы Қырықошақ деген жерде үзілген. Фильмде ақын өмірінің соңғы 40 күні қамтылған. Ақынның қайғылы оқиғаға дейінгі өмірі бейнеленді. Абайды бәрі де ұлы данышпан ретінде біледі,бірақ бәрінен бұрын ол адам еді. Абай ұлдары Оспан мен Әбіштен айырылып, қайғыдан қан жұтты. Бірақ ол кезде тірегі, үміті болған Мағауия тірі еді. Алайда, бұл дерт Мағашты да аямады. Бұл ақын өміріндегі ең ауыр соққы болды Көрермендер ұлы Абайды жаңа қырынан таниды деп сенеміз, – дейді фильм авторы Қанат Тілеухан.

Түсірілімге ұлы ақынның өмірі мен шығармашылығының маңызды кезеңдерінің нағыз білгірлері деуге тұрарлық бірегей тұлғалар қатысты. Олардың қатарында Абайдың шәкірті Уәйіс Шондыбайұлының немере інісі Нәстілек Сәменбетов, атақты Бекен Исабаевтың ұлы, шежіреші  Шажан Исабаев; Тәңірберді Құнанбайұлының ұрпағы Құсман Берлешов , Манатай Балтақайұлы – Ырғызбайдың ұрпағы Манатай Балтақайұлы бар.

— Абайдың соңғы күндері» – «Хабар» агенттігінің жаңа телемаусымдағы бірегей жобаларының бірі. Журналист, жазушы Қанат Тілеуханның жаңадан тұсауын кескен фильмі қазақ халқының нағыз мұрасы саналатын Абай тұлғасына мүлде жаңаша көзқараспен қарауға мүмкіндік береді. Фильм кейіпкерлерінің естеліктері, маңызды тарихи деректер мен сол қасіретті күндердің жай-жапсары көрерменді көп ойға жетелейді, – дейді «Хабар» Агенттігі» АҚ басқарма төрағасы Берік Уәли.

Фильм «Хабар» телеарнасында Республика күні қарсаңында көрсетіледі.