«Астанада 14 жастағы оқушының өлімі»: Қыздың туыстары полицияны әрекетсіздігіне наразы

11 қыркүйекте Астананың оң жағалауында табылған 14 жастағы қыздың мәйітіне байланысты тың деректер шықты. Марқұмның туыстары полицейлерді кінәлап отыр, деп хабарлайды Orda.kz.

Марқұмның әпкесі Карина Александрюктің айтуынша, полиция істі қозғап алып, ары қарай әрекетсіз отыр.

«10 қыркүйекте менің отбасымда үлкен қайғы болды. Сіңілім қайтыс болды. Оның денесі қараусыз қалған ғимараттан табылды. Бірінші күннен бастап Байқоңыр аудандық ішкі істер бөлімінің қызметкерлері мені және отбасымды сіңілімнің денесінде ешқандай жарақат пен зорлық-зомбылық белгілері жоқ деп сендіріп келеді. Іске немқұрайлы қарап, бұл небары қайғыл оқиға деп, қолдарын бір сілтеп отыр», -дейді Карина Александрюк.

Әпкесі оның денесінен гематомалар мен аяқ-қолдарының көгерген жерлерін және ашық жараларды көргендігін айтты. Сонымен қатар, оның айтуынша бұл жағдайға қатысты әлі сұралмаған куәлар мен адамдар бар.

«Менің отбасым қазір өте қиын жағдайда, анам үйден шықпайды, тамақ ішпейді, су ішпейді, ұйықтамайды. Мен полицияның әрекетсіздігіне қатысты көмек сұрағым келеді. Сондай-ақ, басқа балалар үшін де алаңдаймын. Бұл істі соңына дейін жеткізуді сұраймын, қылмысты тек қайғылы оқиға деп жылы жауып қойюға жол бермейік», — деп қосты ол.

Полиция бұл оқиғаға қатысты алдын ала деректерге сәйкес, өлімнің себебі жүрек тоқтауы болғандығын айтты.

«Денені тексеру кезінде көзге көрінетін жарақаттар табылған жоқ. Өлімнің себебі қазіргі уақытта анықталуда, қылмыстық іс қозғалды», деп мәлімдеді полиция.