Астана-Ыстамбұл рейсінің жолаушылары бір тәуліктен артық ұша алмай отыр

Pegasus Airlines әуе компаниясының Астана-Ыстамбұл бағытындағы кешіктірілген рейсінің жолаушылары ұшақтың үш рет әуеге көтеріле алмай қалғанын айтты.

— 26 қараша күні сағат 3.30-да біз Ыстамбұлға дейін, әрі қарай әрқайсысы өз бағытымен ұшатын болғанбыз. Мен әрі қарай Лондонға ұшуым керек еді. Ұшаққа мініп алып, бес сағат отырдық. Аязға байланысты жүк бөлімінің есігі жабылмайды деп бізді кері қайтарды, рейсіміз тоқтатылды. Біз жүктерімізі алдық. Әуе компаниясының қызметкері бізді тамақпен қамтамасыз ететінін айтты. Тағы үш сағат отырдық. Сосын олар әлі де жөндемегендерін хабарлады. Осыны айтып, автобуспен қонақүйге жіберді. Олар сағат 23.30-да қайта алып кететіндерін, сол ұшақ ұшатынын айтты. Біздің рейс бірнеше рет кейінге шегерілді, - дейді жолаушы Гүлмира Байқожаева.

Бойжеткеннің айтуынша, бүгін таңғы 4-те олар ұшақта тағы үш сағат отырған.

— Бізге ұшақта тағы бір ақау болып, қозғалтқыштардың бірі жұмыс істемей тұрғанын айтты. Содан кейін бізге ұшақта қалуды, ал ұшақтан түскендерге  билет құны  қайтарылмайтындығы айтылды. Біраздан кейін дүрбелең басталды. Қарттар мен балалары бар жолаушылар сыртқа шыққысы келетінін айтып, шулай  бастады. Дегенмен сыртқа шығуды шештік, - дейді Гүлмира.

Оның айтуынша, борттағы жолаушылардың көпшілігі Ресей, Түркия, Германия және Румыниядан келген шетелдіктер. Ішінде әлем чемпионатына бара жатқандар да бар.

— Жолаушылардың жартысынан көбі, негізінен ер адамдар, ұшақта қалды, ал балалары бар әйелдер шықты. Бес сағат бойы отырған оларға тағы да мотордың қандай да бір ақауы бар екені айтылды. Оларды салоннан шығарды. Бәрі  жүктерін алып, әуежайдың бірінші қабатында күтіп отыр. Қазір бәріміз әуежайдамыз, 150 шақты адам қалдық, басында 200  адам болған. Келесі рейске билет алуға шамалары барлар  ұшып кетті. Шамасы жоқтар күтіп отыр.

Қазір бәріміз сыртқа шықтық, таңғы төрттен бері тамақ ішпесек те, бізге тамақ берілмеді. Тамақты енді ғана  берді, сол ұшақты күтуге тура келетінін,  қандай да бір қосалқы бөлшекті күтіп отырғандарын айтты. Көбінің қонақүйге төлеп қойған  ақшасы күйіп кетті, өтемақы да, қайтарым да жоқ. Бізге қалсаң  - осы ұшақпен ұшасың, бас тартсаң өзің біл деп айтты, - дейді жолаушы.

Ол үш рет ұшып кете алмаған мұндай ұшақпен ұшуға  бәрі де қорқатындарын мойындады.

Азаматтық авиация комитеті рейстің ағымдағы жағдайы туралы хабарлады.

Олар 26 қарашада сағат 03.30-да ұшып шығуы тиіс Pegasus Airlines компаниясының Астана – Ыстамбұл бағытында ұшатын PC 229 рейсі техникалық себептерге және экипаж уақытының аяқталуына байланысты кейінге қалдырылғанын айтады.

«Барлық жолаушылар қонақүймен, сондай-ақ сусындар мен ыстық тамақпен қамтамасыз етіледі. Кейбір жолаушылар 28 қарашада Астана - Ыстамбұл бағыты бойынша Pegasus Airlines RS 229 рейсіне қайта брондалады. Сондай-ақ, әуе кемесінің техникалық ақауын жою үшін Ыстамбұлдан Астанаға RS 228 рейсімен  қосалқы бөлшектер жеткізіледі. Бұл ретте әуе компаниясы барлық мүдделі жолаушыларға әуе билеттері құнын қайтарады»  деп хабарлады Комитет.