«Астана» велокомандасына 31 миллиард теңге жұмсалады – депутат

Депутат Мұрат Әбенов туризм және спорт министрі Ербол Мырзабосыновқа «Астана» велокомандасына қатысты сұрақ жолдады, деп хабарлайды Orda.kz.

Депутаттың айтуынша, еліміздің бүкіл спорт саласына 35 миллиард теңге бөлінсе, тек «Астана» велокомандасына 31 миллиард теңге жұмсалады. Алайда үлкен шығындарға қарамастан, нәтиже жоқ. Мәселен, команда капитаны Токио ойындарында 21-ші болса, Парижде 51-орын иеленді.

«Команда шетелде өнер көрсетуде, бұл бизнестік жоба, бірде-бір рет елдің туы көтерілмеді, біздің ел туралы мүлдем ештеңе айтылмайды. Команда Қазақстанға мүлдем келмейді, Еуропада өнер көрсетіп, бәрі сол жақта жүреді», деді Әбенов.

Сондай-ақ, команданың 29 мүшесінен 10-ы ғана Қазақстан азаматы. Депутат өңірлерден келген спортшыларға материалдық қолдау көрсету қажет екенін атап өтті.